[RePlay] الجولة الرابعة ~

السلام عليكم, نتمنى تكونو بخير وعلى خير. ورمضان مبارك سعيد ليكم أجمعين🌙💕.

الجولة الرابعة من تجربة RePlay سالات وجيت كالعادة نشارككم شنو تعلمت ولا كنتعلم فهاد الشهر أو باختصار شنو عصارة هاد الشهر لي داز💁‍♀️

أول حاجة بالنسبة للمواد لي كنقرا متبدل والو مزال فقط C و Algorithms.

لكن لي غنشارك معاكم هاد المرة هو شنو تبدل في الجدول الزمني ديالي ولا تنظيم الوقت ديالي, كيفاش وليت كنخطط لأهدافي وكيفاش كنقرا دوك المواد بذكاء أو بطريقة سلسلة وزوينة. على الاقل حتى هذه اللحظة ههه حيت كل شهر كنستافد كتر وكنبدل شيحاجات باش كنحسن من الآداء ديالي في التعلم. وهادي هي النصيحة الأولى فهاد المقال: تعلمو تديرو لراسكم تقييم شهري سواء فقرايتكم ولا خدمتكم بهاد الطريقة كتعرفو شنو لي راكم غادين فيه مزيان وشنو لي راه غالط. وهدشي لي عاوني نبدل بزاف دالحوايج لا لاحظتو مني بديت التجربة حيت هدي هي طريقتي. مهم منطولوش وندوزو لشنو استفدت فهاد المدة لي دازت.

بالنسبة لتنظيم الوقت والمهام كيف كتعرفو كنت دائما كندير واحد لائحة مهام يومية وكنت كنستعمل فبعض الأحيان Trello باش كنحط فيه دكشي لي تابعني باش منساهش. بعض الأصدقاء اقترحو عليا من قبل بشهور أنه نجرب Notion. ولي حتى هو أداة كتعاونك تنظم المهام ديالك وبزاااف دالحاجات لي يطيحو ليك على البال. مهم تجربتي معاه اللولة مكانتش موفقة وقلت يمكن عيان. ولكن منين حطيت مقال الجولة الثالثة عاودو اقتارحوه عليا وعاودت عطيتو فرصة واتضح انه اناااا لي عيانة ههههه حيت معطيتوش وقت باش نستكشفو مزيان. وطلع رااجل ونص وكيدير خدمتو ههه.

مهم Notion هو اكتشاف الشهر بالنسبة للأدوات لي كيعانوني على زيادة الانتاجية وبغيت نشاركو معاكم باش حتانتوما تجربوه. فيه كنقدر نتبع أهدافي الشهرية ونحط فيه الخطة لي باغا نتبع في التعلم تاعي. وننظم فيه أي حاجة طاحت ليكم على البال.

باش منطولش بزاف فهاد الفقرة حيت الهدف هو نعطيكم فكرة على حاجات غيعاونوكم في قرايتكم كيفمت عانوني. غنعطيكم صور لبعض الاستخدامات لي أنا كندير فيه وهدشي غي شهر باش بديت كنستعملو أما ناس لي كيستخموه من شحال اتلقاوهم تينظمو بيه العجب في حياتهم.

مبدئيا, هادي هي المنهجية لي كنمشي عليها. قراوها وغنقوليكم شنو هي.

أول حاجة كنعتمد عليها هي الوقفات والمكافأة Breaks & Rewards (pomodoro).
الوقفات بمعنى مكنقراش بشكل متواصل وهاد القضية فايت مني قلتها على ما أعتقد وكنخدم بتقنية بومودورو Pomodoro اللي المبدأ تاعها أنه ورى كل 25 دقيقة عمل أو دراسة كناخدو 5 دقائق استراحة و منين كنكملو ساعتين على هاد شكل يعني 4 الجولات كناخدو استراحة لي مدتها 15 دقيقة وعاد نرجعو نكرروا نفس الشيء اا كنا غنقراو أكثر من ساعتين.

بالنسبة للمكافأة ديجا بعدا ديك الوقفات لي كنديرو بالنسبة للدماغ راه مكافأة صغيرة أنه خدم لمدة 25 ولا 30 دقيقة متواصلة. ولكن كنصيحة فديك 5 دقايق متمشيوش ديرو شيحاجة لي غتجركم لفترة أطول خصووووصا الماكلة ولا السوشال ميديا هاد جوج حاجات لمشيتي تا طليتي عليهم بقيتي تما.خاصة للناس لي باقي ما بناوش واحد المقاومة تجاه السوشال ميديا.
عاد كين المكافأة لي تقدر تدير لراسك منين تلتزم بالمدة لي قررتي تقرا فالنهار أو فالسيمانة مثلا تصاوب لراسك شي أكلة عزيزة عليك ولا تدير شي نشاط عزيز عليك ولا تخرج مع صحابك إلخ آخره هنا غتختالف من شخص لشخص. المهم كتكافئ راسك على القراية ولا الخدمة لي درتي. علاش؟ هدشي كيساعد أن دماغك مع الوقت كيولي يشوف الخدمة ولا القراية كشيحاجة زوينة حيت كيولف باللي وراها غادي تكافؤ تماما فحال كيكندريسيو شي حيوان أليف منين كنبغيوه يولف يدير شي فعل كنكافؤوه بشيحاجة كتعجبو غالبا كتكون ماكلة ..نفس المبدأ ونفس الطريقة باش كيولف الدماغ يدير واحد لفعل معين عن طيب خاطر. وغتولي عوض تكره القراية ولا الخدمة وما جا منها اتلقى راسك لا مخدمتيش ولا لمقريتيش مكيدوزش نهارك مزيان وكتحس بيه خاوي وكتحس براسك مقلق وكتولي عزيزة عليك الخدمة والقرايا.

علاش 25 تال 30 دقيقة وماشي قل ولا اكثر, لانه علميا هادي هي المدة لي دماغك يقدر يستوعب فيها معلومات بلا ما يكون خدم فوق القياس وما شدش ليك كلشي في حالة مدة أطول أو مازال مخدمش كاع وباقي مبدا يشد والو في حالة مدة أقل.

وعلاش المكافأة؟ لأن هدا هو الميكانيزم تاع دماغ واذا شيحد فيكم فايت قاري على الادمان وكيفاش كيطرا غيفهم باللي الدماغ كيخدم مع كلشي بنفس الحاجة, علاش الناس كيوليو مدمنين على شيحاجة؟ ببساطة وبلاما ندخل فشروحات علمية طويلة حيتاش كين فيها شيحاجة تعتبر مكافأة للجسم وكتعطيك شعور زوين وبالتالي كتسجل فالدماغ وكتولي مدمن عليها مع الوقت والتكرار.

بنفس الميكانيزم تقريبا كنبداو نولفو الخدمة أو القراية إذا كنا كنكافؤو راسنا, غي هو في هاد الحالة كتسمى عادات صحية ومكتكونش إدمان وإنما كتدير لراسك ما يسمى بـ”بناء العادات” حيت ماشي شيحاجة لي كتولي مدمن عليه بصفة مبالغ فيها كيفما المخدرات أو الكحول إلخ من أنواع الإدمان.

تاني حاجة هي البلاصة لي كنقراو فيها Study Area.

خاص البلاصة لي كنقراو فيها يكون عندها واحد الهالة خاصة بيها ممكن نقولو؟ لي عندو بيتو الخاص بيه مزيانة كاع ويكون عندو بيرو تاعو داك البيرو مياكلش فوق منو ولا يدير شي نشاط آخر لي ممكن خلال العمل ولا الدراسة يتفكرو ويلهيه عليها. البلاصة تاع القراية خاصها تكون تاع القراية.

أما بالنسبة للناس لي معندهمش بيت خاص بيهم (ولي بحالي كنقرا فالصالون ههههه) ممكن يخلقو لراسهم طقوس تاع القراية وواحد القنيت خاص للقراية ولا الخدمة. بحال فاش كنبغي نقرا كنمشي نوجد ليا أول حاجة قهوة ولا اتاي ولا تجيب غي الماء ولا شوف شنو كتبغي تاكل ولا تشرب ونتا خدام أو كتقرا حطو حداك, كنجيب الكتب لي كندون فيهم الملاحظات ديالي لي كنبغي نكتب كملخص لدكشي لي تعلمت, وكنجيب واحد المفكرة. هديك المفكرة كنكتب فيها أي أفكار طاحو ليا فبالي وأنا كنقرا بغيت نديرهم حيت فاش كنبغيو نقراو سبحان الله عاد تيبدا يخرج الابداع لي فينا وكنوليو نبلانيو كيفاش غنصوبو دراجة هوائية من 0 تا تولي كتدوي معانا 🤪وكنوضو نبداو ديك الفكرة ونخليو قرايتنا لذلك فبلاصة منوض كنكتبها تماك وحتااا تانسالي قرايتي عاد ندوز ليها حيت هديك غي حيل من دماغك باش يلهيك على القراية.

حاجة أخرى هي تكون الطابلة منظمة والصالون حتى هو, بالنسبة ليا حتى هدشي كيخليني نركز كتر, وكذلك متنساوش تجيبو ليكم الماء وشيحاجة تاكلوها فاش يجيكم الجوع باش ماتضطروش تنوضو لجهة الكوزينة ولا تلاجة لانكم غتبقاو تما وفجأة كتولي الكوزينة زوينة وكتحلى ليك جماعة مع أي واحد داز من حداك.

ثالث حاجة هي التعلم الفعّال أو الـ Active Learning
كنتبعو واحد القاعدة ولا خطوات كيتسماو SQ3R. ولي هي الحرف الأول من الكلمات لي وراها فالصورة ولي هوما Survey, Question, Read, Practice, Recit, Review.
وأول جوج Survey وQuestion هي منين كنشدو داك الجزء لي باغين نقراو ولا نتعلمو كنديرو عليه طليلة بلاما نركز فيه, اذا كان chapter فشي كتاب مثلا كنقراه غي دايز مكنبقاش نحكر على كل حاجة وخلال داك القراءة السطحية كيبداو يتكونو عندي أسئلة فراسي تلقائيا على شي حوايج أشنو كيعنيو ولا لاش كيصلاحو. هاد الأسئلة غتجاوب عليهم تاني بلا قصد فاش غادي دير Read أو فاش غترجع تبدا القراءة من اللول ولكن هاد المرة قراءة متأنية وكل جزء مكتفوتو حتى تفهمو مزيان وهنا كتلقى راسك تعودتي على بعض الفقرات وكذلك كتجاوب لدماغك على الاسئلة لي جاوك من قبل وهاكا كيترسخو المعلومات أحسن من ايلا جيتي نيشان وبديتي كتقرا وتشرح إلخ. من بعدما كنقراو وكنفهمو داك الجزء بالنسبة للمواد لي فيهم التطبيق أو التمرن practice كنديروه. وهو فاش كنديرو تمارين أو مشاريع صغيرة أو كبيرة عل حسب فين راك واصل وشنو كتعلم. وفي حالة شيحوايج لي خاصك تعقل عليهم كنديرو Recit أو كنعرضو بمعنى الحفظ وعاد آخر مرحلة هي المراجعة. قدما راجعتي دكشي لي فهمتي أكثر من مرة وخاصة على فترات متباعدة قدما كيثبت أكثر.

عاوتاني كيخص نحضيو مع واحد القضية وهي إلا كانت شي حاجة ممكن نفهمها وماشي غير نحفظها خاص نفهمها لأنه غنعقل عليها أكثر وبشكل أسرع من ايلا حفظتها غير هكاك. وهادي هي المقصود بـFacts & Concepts. الـ Facts هي فاش كنعرفو الحاجات سطحيا كيوليو شيحاجة محفوظة عندنا وصاف. مثلا, البوم مني كيطير مكيديرش الحس هادي Fact. في حين الـ Concepts أو المفاهيم هي منين كنفهمو الحاجة أو الـFact علاش هي هكاك في حالة المثال لي عندنا, حيت لقاو العلماء، بلي جناوح تاع البوم فاش كيطيرو كتتميز بحركة ديناميكة عالية، إضافة إلى أن الريش تاعها كيمتص الاهتزازات، الشيء لي كيزيد من تراجع الصوت، في حين أن الصقور والحمام عندها طبقات من الريش المثالي لي كيلبي لاحتياجات رحلاتها، على خلاف البوم لي عندو الريش ناعم وبالتالي عازل لأي تيارات هواء إضافية كتنتج على حركة الأجنحة ديالها في خلال الطيران، باش كتعطيها رحلة صامتة وحتى منين كتصيد متاتسمعش.

فاش كنفهمو الحاجة كنعقلو عليها أكثر خصوصا لدرنا داك الخطوات لي قلنا قبل وكونا واحد الاسئلة تاع الفضول وجاوبنا عليهم بالفهم كيثبت لينا دكشي مزيان.

حاجة الرابعة هي نعلم دكشي لي فهمت لناس آخرين Teach it to others.

فاش كتشرح الحاجة لي تعلمتيها لناس آخرين كتعقل عليها كثر, هاد القضية ماشي بالضرورة تكون بشكل مثااالي ممكن غي صاحبك تقولو عرفتي شنو تعلمت اليوم وتشرحلو دكشي لي تعلمتي, هنا راك طبقتي هاد القضية. وممكن تشاركها مع الناس لي عندك على الانترنت, بشرط أنك تذكر باللي راك مزال كتعلم باش متظلمش راسك وتظلم ناس آخرين لي ممكن مبتدئين ويسحاب ليهم شيواحد محترف كيعلم فيهم, خاصة شيحاجة لي مضابطهاش, وحتى انك كتعطي فرصة للناس لي ممكن يصححو ليك شي معلومة يصححوها ليك. وهاكا كتبادلو المعلومات وحتى الارشاد من الناس لي فايتينك مكتفوتوش.
آخر حاجة هي MNEMONICS.
هادي تقنية ديال الحفظ وهي أنك عوض تحفظ بجهد كتحفظ بذكاء وكتحاول تربط هدكشي لي كتحفظ بشيحاجة نتا حافظها ولا عارفها ولا كتضحكك ولا أغنية إلخ. بحال كنعقل في الباك كنت SVT وكان عندنا بزاف دالحاجات كيخصنا نحفظوهم خصوصا في الدروس ديال استهلاك الطاقة. وكان عندنا واحد الانزيم الدور تاعو بسيط ولكن خاص نعقلو عليه كان غير كيوصل واحد الزيئات وتيرجع وهكذا دواليك طيلة الوقت كنا كنقولو عليه طالب معاشو وهاكا كنبقاو عاقلين عليها.

يعني عامة المبدأ هو أنك كتفنن كيفاش تحفظ ديك الحاجة بشيحاجة أخرى لي كتعقل عليها كثر ولا كضحكك ولا شي لحن تاع شي أغنية كتعجبك كتحفظ داك المعلومة باللحن تاعها إلخ.

مؤخرا وليت كنعتمد على SMART Goals.
بمعنى أهداف ذكية, الفكرة الأساسية هي أنه عوض نحطو أهداف كبار ونبغيو نحققوهم فوقت أقل ومنعرفو منين نبداو كنحطو أهداف صغار وذكيين لي غيوصلونا لدوك الأهداف الكبار. عامة الإسم اختصار لـ :
S = Specific
M = Measurable
A = Achievable
R = Relevant
T = Time Bound

Specific, بمعنى تحط واحد الهدف بشكل دقيق مثلا متقولش أنا غنتعلم هاد الشهر لـ Web Dev وتسكت. هنا محددتيش لراسك أشنو بالضبط باغي تعلم. خاصك تقول مثلا غنبدا بـ HTML هاكا كتسمى حددتي.

Measurable, بمعنى تكون شيحاجة ملموسة وماشي غي كنتخيلها فالسما, مثلا انمشي نقلب على الاساسيات اللولين لي خاص يعرفهم الواحد في HTML ونكتبهم وهوما لي غنتبع حتى نقراهم كاملين. هنا حددت الكم أو شحال أو شنو بالضبط خاصني ندير فالهدف تاعي.

Achievable, يعني قابلة للتحقيق, مثلا منجيش نقول غنتعلم لـ web dev كامل فشهر! ميمكنش! ولكن ممكن أساسيات HTML اللولة بالتطبيق ديالها نتعلمهم فشهر معقولة.

Relevant, هي عندها علاقة بالوضع الحالي ديالي. ماشي مثلا أنا أول مرة غنقيص web dev وغنوض نبدا بـ CSS! خاص نبدا بدكشي لي أنا محتاج ضروري وكيتعتبر من الاساسيات أو الحاجات الاولى لي خاص نبدا بيها باش نوصل للهدف الكبير ديالي فالاخير. لمدرتيش هاد شرط بحالي ايلا حطو ليك كسكسو وبديتي من وسط القصعة.

Time Bound, هي يكون محدود بوقت. منقولش غنتعلم لـ HTML ونسكت ونخليها سارحا هاكا مغاديش نحضي مع الوقت. نقول مثلا فهاد الشهر غنضبط أساسياتو مزيان ونحط واحد الخطة ديال التعلم تاعو لمدة شهر.

وهدا ما كان, بالنسبة للوقت تاع الدراسة ديالي قبل ما يدخل رمضان كنت ولات عندي عادة كنوض مع الفجر كنصلي وكنبقى نقرا من وراه شي ساعتين ولا 3 سوايع على حساب. ولكن أكيد بدلتو مع رمضان وهادي معندي مننصحكم فيها لأنه كالعادة كل واحد والتزاماتو وشنو كيحدو مع الوقت لكن عامة انا مبقيتش كنقرا ورا الفجر وليت كنقرا من ورا التراويح حتال وقيتة السحور كتجيني أحسن مني يفوت رمضان إن شاء الله عاد نرجع نقرا ورا الفجر.

كنفكر من بعد نشارككم تجربتي كيفاش وليت من إنسان ليلي لإنسان صباحي🙆‍♀️.

عامة رمضان مبارك سعيد مرة أخرى, وكنتمنى ليكم كاملين التوفيق في خدمتكم ولا قرايتكم. نتلاقاو فاللخر تاع شهر ماي إن شاء الله لبقينا في الحياة, السلااام عليكم 👋

رأي واحد على “[RePlay] الجولة الرابعة ~

♥ ردودڪِم تسعدنِي فأنثروا ما شئتمْ :

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s